Jolasgunea zein familian arratsalde pasa egiteko aukera polita izan daiteke Gasteizko Olarizu parkea. Hiriburuaren Eraztun Berdea osatzen duen parkeetako bat da eta 120 hektarea ditu.
Handia da beraz, eta handitasun horretan Olarizu etxaldea, lorategi botanikoa eta Olarizuko baratzeak aurkitzen dira.
Leku ia laua da eta aproposa, beraz, esfortzu oso handia egin gabe luzaroan ibiltzeko. Seinaleztatuak dauden hainbat ibilbide ditu eta ibilbide horietan iturriak, bista panoramikoak, jolas-eremua, hiru bat urmael eta atsedenguneak aurkituko ditugu.
Hainbat sarrera ditu Olarizu parkeak eta sarrera askotan aparkalekuak, jolas-eremuak eta aisialdiguneak. Autobus geltokiak ere badaude gertu.
Olarizuko etxaldea da lorategi botanikoaren bisita hasteko lekurik onena.
Bost ibilbide
Lorategi botanikoa da Olarizu parkea eta bost baso mota daude bertan bakoitza bere ibilbidearekin. Parke horietako bakoitza fase desberdinetan dago; badira martxan daudenak eta badira oraindik ere proiektu direnak. Dira mediterranear basoa, konifera-baso boreala, baso hostogalkor hostotsuak, baso hostogalkor ez-hostotsuak, eta sendabelarrak eta interes etnobotanikodun landareak.
Familian egokia
Oinez zein bizikletan egin daiteke Olarizu parkearen bisita. Urmaeletan ahateak eta askotariko hegaztiak daude. Arrainak ere bai. Umeak gustura ibili ohi dira.
Urmaeletako batek, gainera, zubi flotatzailea du eta esperientzia polita izan daiteke halakoren bat ezagutzen ez duten neska-mutikoendako.
Leku zabala eta lasaia da Olarizu, eta hirigunetik gertu dago.
