Oñati ingurura (Gipuzkoa) gerturatzen bazarete familia giroan lasai egoteko espazio ugari aurkituko dituzue. Natur gune ugari dituen herria da; besteak beste, Aratz Aizkorri natura parkearen sarbideetako bat da eta ezin aipatu gabe utzi Arantzazuren garrantzia.
Herri inguruan leku lasai eta atsegin bat behar baduzue San Martin parkea aukera egokia izan daiteke. Hosto aldakorreko zuhaitzak dituen parkea da, beraz, urte sasoiaren arabera aldatu egiten da parkearen itxura eta kolorea. Dena den, beti da lasaia eta atsegina.
Autokarabanen gunea du ondoan, eta Oñatiko toki berde handienetakoa den hariztietako batean kokatzen da. Hainbat zerbitzu eskaintzen ditu, besteak beste, piknik gunea, komunak, itzaletan dagoen pasealekua, iturriak, eserlekuak…
Parke honetan XVI. mendeko San Martin baseliza ere badago. Bertatik ia herri osoa ikusten da. Berezao eta Lezesarri baserri-inguruneak eskuin aldean eta Aloñako mendilerroa aurrez aurre.
Erdigune historikoa 200 bat metrora dago eta bidegorria dago bizikletaz zein oinez joateko. Autobus geltokia ere gertu du. Arantzazura –igande eta jaiegunetan– edota inguruko beste herrietara joan daiteke bertatik.
