Espazioak jolasteko eremuak izateaz gain harremantzeko ere badira. Harreman hauek espazioaren konfigurazio eta ondorioz erabileraren araberakoak izaten dira. Hortaz, gure herrietako espazio publikoek eta jolas guneek duten konfigurazioa oso garrantzitsua da haurren harreman hauek sustatu eta eraikitzerako orduan, bai genero berdintasuna zein adin ezberdinetako haurren erlazioa eta orokorrean elkarbizitza lantzeari begira. Normalen parke eta lorategietako jolasguneak helduek diseinatzen eta antolatzen dituzte goitik behera. Sarritan, ekipamendu sintetikoetan eta era tradizionalean konfiguratu diren espazioak errepikatzen dira behin eta berriz, horren ondorioz mugatu egiten dira ustez sustatu nahi diren jolas-aukerak. Haurren iritzia jasotzetik hasi, helduon beldurrak landu eta modu parte-hartzailean jolaserako espazioak sortzea beharrezkoa da. Natura, parte-hartzea, hezkidetza, aniztasuna, autonomia, jolasa eta sormena oinarri harturik jolasguneak eraiki beharra daukagu.
Jolas eremua haurren hezkuntza eta elkarbizitzarako gunea izanik, eremu publikoan eta bereziki haur eta gazteen jolasguneetan ezinbestekoa da aipatutako balioetan oinarritutako jolas aniztasun bat eskaini ahal izatea, konfigurazio “tradizional”-etatik ihes eginez. Gainera, espazioak banatzeko
eta erabileraren arabera sailkatzeko jendartearen estrukturaketa aintzat hartu behar dugu, botere harremanak ere ematen direlako eremu fisikoen distribuzioan. Horregatik balioz jantzi behar ditugu espazio hauek, denontzako espazioak sortuz aukera bardintasunean, aniztasunean eta askatasunean oinarrituz. Garrantzitsua da beraien arteko harremanak hezkidetza eta elkarerrespetuzko balioetan oinarrituak izan daitezen espazioa ere balio horietan oinarrituz diseinatzea.
Aatigarragako udalak Hiritik At kooperatibarekin egin zuen herriko 14 jolas parkeen azterketa. Behaketak egin ondoren haur eta nerabeekin batera aztertu eta proposamenak bildu zituzten, hauetako 6 parkeen eraldaketarako.
Guk, Izaskun Soto Hiritik At eko arkitekto eta hirigilearekin hitz egin dugu prozesuaren nondik norakoak ezagutzeko.
